دوشنبه , 15 آذر 1400

«ارک» جمعیتی‌نین بیلدیریشی؛ آزربایجان میللتی اوچون بؤیوک بیر باشاری

آزربایجان اینسان حاق‌لاری جمعیتی (ارک)، آزربایجان میللتی و اینسان حاق‌لارینین طرفدارلارینا و ساوونوجولارینا بیلدیریر: ارک، ۱۱ ایل اینسان حاق‌لاری ساحه‌سینده چالیشدیقدان هابئله ۷ ایل اولوس‌لار آراسی حقوقی کیملیک قازانما قونوسوندا چابا گؤستردیکدن سونرا بیرلشمیش میللت‌لر تشکیلاتی‌نین اقتصادی و توپلومسال بؤلومو طرفیندن “مصلحتچی” آدینی قازاناراق مصلحتچی قونومونو الده ائتدی.

ارک اینسان حاق‌لاری جمعیتی، ۲۰۱۱جی ایلده پاریس‌ده بیر قوروپ گونئی آزربایجانلی اینسان حاق‌لاری ساوونوجوسو طرفیندن قورولاراق فرانسا حؤکومتی‌نین یاسالاری چرچیوه‌سینده رسمی اولاراق ثبت اولوبدور.

ارک اینسان حاق‌لاری جمعیتی، بوگونه‌دک اینسان حاق‌لاری قونوسونداکی چالیشمالارینی یئرینه یئتیرمک اوچون فرانسا و اتریش اینسان حاق‌لاری جمعیت‌لرینین اولاناق‌لاریندان یارارلانماقدایدی. آنجاق، بوندان سونرا بیرلشمیش میللت‌لر تشکیلاتی طرفیندن رسمیته تانینماسینا گؤره، بیرلشمیش میللت‌لر تشکیلاتی‌نین اینسان حاق‌لاری شوراسی‌نین جنوره‌ده‌کی (ژنو) اوتوروملارینا هابئله بیرلشمیش میللت‌لر تشکیلاتی‌نین اقتصادی و توپلومسال بؤلومو نیویورک‌داکی توپلانتی‌لارینا اؤز آدی هابئله باغیمسیز کیملییی ایله قاتیلاراق مصلحتچی باخیش‌لارینی اورتایا قویاجاقدیر.

آزربایجان میللتی‌نین مدنی ساواش تاریخینده، ایرانین مرکزی حؤکومتی هابئله اونو دستکله‌ین اؤلکه‌لرین آغیر باسقی‌لارینا باخمایاراق، ایلک دفعه اولاراق بیر مدنی قورولوش، اولوس‌لار آراسی چاپدا اؤزونو قبول ائتدیرمه‌یی باشاریر. بو اوغورلو باشاری گله‌جک‌ده آزربایجان میللتی‌نین داها بؤیوک باشاری‌لارینا یول آچاجاقدیر.

یاخین گله‌جک‌ده، آزربایجان میللتینه، ایره‌لی‌له‌دیییمیز یول هابئله اوزلشدیییمیز چتین‌لیک‌لر حاققیندا گئنیش بیلگی وئره‌جه‌ییک. ارک جمعیتی، توتدوغو بو اینسان حاق‌لارینی ساوونان حاقلی ساواش یولوندا، آزربایجانلی مدنی دوستاق‌لارین اؤزگورلویه بوراخیلماسی هابئله هر تورلو آیری‌سئچکی‌لییه قارشی آپاردیغی ساواشدا، آزربایجانلی مبارز شخصیت‌لرین هامیسینین یاردیمینی گؤزله‌مکده‌دیر.
آزربایجان جمعیتی‌نین (ارک) مودورو
ژاله تبریزی
۲۸ آقوست ۲۰۲۱

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *